Холивудската актерка Хејден Панетиер починала од токсичните ефекти на фентанил, 4-ANPP, алпразолам (Ксанакс), метокарбамол и кветиапин, покажува официјалниот извештај за нејзината смрт, објавен повеќе од еден месец по трагичниот настан.
Панетиер починала на 16 август на 36-годишна возраст во Гринвил, Јужна Каролина. Според Канцеларијата на судскиот вештак во округот Гринвил, смртта е класифицирана како несреќен случај. На обдукцијата не биле утврдени повреди кои придонеле за нејзината смрт.
На денот на смртта, во 13:51 часот, полицијата добила повик за лице со срцев застој во домот каде што актерката привремено престојувала. Кога пристигнале екипите за итна медицинска помош, Панетиер била без свест. Била започната реанимација, но без успех, а смртта била констатирана во 14:32 часот.
Во моментот на настанот со неа биле нејзиниот поранешен партнер Брајан Хикерсон и неговиот брат Зак. Според полицискиот извештај, двајцата биле во станот кога актерката била пронајдена без свест.
Панетиер ја започнала актерската кариера уште како дете, а пошироката публика ја запозна преку филмовите „Сеќавање на Титаните“ и „Ледена Принцеза“, како и преку сериите „Херои“ и „Нешвил“.
Во текот на кариерата, таа отворено зборувала за проблемите со алкохолот и зависноста од супстанции, како и за постпородилната депресија.
Актерката ја има ќерката Каја, родена во 2014 година од врската со украинскиот боксер Владимир Кличко. Во 2018 година, додека Панетиер се лекувала, старателството над девојчето го презел Кличко.
По нејзината смрт, семејството ја опиша Панетиер како личност која им донела голема радост и која засекогаш ќе им недостига.
