На 27-годишна возраст почина Пресли Гербер, син на познатата манекенка Синди Крафорд и бизнисменот Ренде Гербер. Американските медиуми објавија дека тој во периодот пред смртта престојувал во установа за лекување од зависност со која се борел со години.
Веста ја потврдил портпарол на семејството, кој побарал почитување на нивната приватност во тешкиот период. Од канцеларијата на судскиот лекар во округот Лос Анџелес потврдиле дека Гербер бил во установа за лекување, додека точната причина за смртта ќе биде утврдена со обдукција.
Пресли првиот договор со модна агенција го потпишал на 15-годишна возраст. Со проблемите со зависноста се соочувал повеќе години. Во 2018 година бил уапсен поради пребрзо возење, при што полицијата утврдила дека бил под дејство на алкохол.
Во 2024 година јавно зборувал за долгогодишната зависност од опијати, откривајќи дека по предозирање со фентанил поминал неколку дена во кома. Подоцна зборувал и за зависноста од лекови што се издаваат на рецепт, како и за неговиот пат кон поздрав начин на живот. На социјалните мрежи објавувал видеа во кои споделувал искуства и совети поврзани со промената на животните навики.
Неговата сестра, 25-годишната манекенка Каја Гербер, минатиот месец првпат јавно зборувала за неговата борба со зависноста и влијанието што таа го имала врз целото семејство.
Семејството на Пресли Гербер преку својот портпарол побара јавноста да ја почитува нивната приватност додека трае истрагата за причината за неговата смрт.
