Во Австрија денеска започна судењето на 21-годишен маж обвинет за планирање исламистички напад на концерт на американската пејачка Тејлор Свифт во Виена во 2024 година, кој бил спречен непосредно пред одржувањето.
Обвинетиот, идентификуван како Беран А., бил уапсен на 7 август 2024 година, ден пред првиот од трите планирани концерти во Виена, кои потоа биле откажани, пренесува „Кронер Цајтунг“.
Според обвинителството, тој бил инспириран од Исламската држава и преку интернет набавувал упатства за изработка на експлозивни направи.
Неговата адвокатка навела дека обвинетиот ќе се изјасни за виновен по главните обвиненија поврзани со планирањето на нападот на концертот, додека за останатите точки од обвинението, вклучително и припадност на терористичка организација, ќе негира вина.
Обвинителството тврди дека Беран А. се обидел да набави оружје и да произведе експлозив, како и дека бил во контакт со лица кои планирале слични напади во странство.
Во случајот е опфатен и словачкиот државјанин Арда К., кој исто така се наоѓа на обвинителната клупа.
Според обвинението, двајцата мажи и уште еден осомничен наводно планирале координирани напади во различни градови на Блискиот Исток во пресрет на концертот, при што еден од нив веќе бил уапсен во Саудиска Арабија по напад во Мека.
Судењето се одржува во Винер Нојштат, а закажани се повеќе рочишта до мај, со можност постапката да биде продолжена.
Обвинетиот се соочува со казна затвор од 10 до 20 години доколку биде осуден.
