Полскиот нуркач Бартломиеј Питала, кој достигна длабочина од 338 метри во подводната пештера Врело на Матка, е прогласен за почесен граѓанин на Скопје. Одлуката беше донесена денеска на седница на Советот на Град Скопје.
Питала го постигна историскиот резултат во рамките на меѓународната експедиција „Врело 2026“, со што пештерата Врело стана најдлабоката подводна пештера во светот истражена од човек. Во експедицијата учествуваа нуркачи од Македонија, Полска и Италија.
Со признанието, Скопје му оддава почит на Питала за неговата храброст, посветеност и придонес во светската промоција на градот и неговото природно богатство.
Од Град Скопје истакнуваат дека овој успех претставува можност за привлекување поголем број туристи, истражувачи и љубители на природата, кои ќе можат да ја откријат пештерата Врело и убавините на Матка.
