Болниците во подножјето на Монт Еверест бараат дополнителни количества противотров поради зголемениот број каснувања од отровни змии на височини каде што досега речиси и не биле забележувани, пренесува „Телеграф“.
Здравствените власти во Непал предупредуваат дека поради порастот на температурите, отровници како кралската кобра сè почесто се движат кон повисоките планински предели, со што се зголемува ризикот за локалното население, планинарите и туристите.
Основната болница во Сотанг, во округот Солухумбу, каде што се наоѓа Монт Еверест, побарала од Министерството за здравство да обезбеди резерви на противотров. Според лекарот Паван Моктан, од средината на април досега во болницата биле згрижени околу 30 пациенти по каснување од змија, а двајца од нив биле каснати од отровници и биле префрлени на лекување во Катманду.
Слични барања пристигнуваат и од други болници во планинските региони, каде што лекарите бележат сè повеќе случаи на каснувања од змии надвор од нивните вообичаени живеалишта.
Експертот за змии и професор Санџиб Кумар Шарма смета дека климатските промени создаваат поповолни услови за овие видови да преживуваат на поголеми надморски височини.
Како пример го наведе случајот од минатата година, кога јапонски планинар бил каснат од отровна јамичарка во близина на базниот камп на Монт Еверест, но успешно закрепнал.
Според Шарма, каснувањата од змии претставуваат една од најзапоставените закани за јавното здравје во Непал. Истражувањата покажуваат дека околу 80 проценти од смртните случаи се случуваат пред повредените воопшто да стигнат до здравствена установа.
Минатата година спасувачите во близина на Монт Еверест уловиле десет отровни змии, од кои дури девет биле кралски кобри. Експертите предупредуваат дека без навремено обезбедување соодветен противотров, бројот на жртви во планинските региони би можел дополнително да се зголеми.
