Португалија избори пласман во осминафиналето на Светското првенство, откако со гол во четвртата минута од судиското продолжение ја совлада Хрватска со 2:1. Натпреварот понуди вистинска фудбалска драма, со три погодоци, бројни шанси, погодени рамки на голот и неколку поништени голови поради офсајд.
Во првите 45 минути Португалците беа поопасниот противник и создадоа повеќе можности за погодок, но не успеаја да ја совладаат хрватската одбрана. Хрватска ретко се закануваше, па на полувремето резултатот остана 0:0.
Во вториот дел „коцкестите“ заиграа многу поофанзивно и во 53. минута поведоа преку Иван Перишиќ. Само неколку минути подоцна постигнаа уште еден гол, но истиот беше поништен поради офсајд. Истата судбина ја доживеа и погодокот на Кристијано Роналдо.
Португалија израмни во 68. минута, кога по интервенција на ВАР беше досуден пенал. Роналдо беше сигурен реализатор и го постави резултатот на 1:1.
До крајот следуваа нови возбудувања. Во 81. минута Лука Сучиќ повторно ја затресе мрежата на Португалија, но и неговиот погодок беше поништен поради недозволена позиција. Леао ја погоди пречката, додека Ковачиќ ја затресе стативата на спротивната страна.
Решавачкиот момент се случи во 94. минута, кога Рамош најдобро реагираше по центаршутот на Леао и со удар со глава го комплетираше пресвртот за голема победа на Португалија.
Хрватска во последните мигови уште еднаш ја испрати топката во мрежата, но и тој гол беше поништен поради офсајд, со што Португалија го потврди пласманот меѓу најдобрите 16 репрезентации.
Во осминафиналето Португалците ќе се соочат со Шпанија во еден од најочекуваните дуели на турнирот.
