Од четврток, 15 октомври, во Србија стапуваат во сила нови износи на туристичката такса за престој, која ќе се движи од 90 до 240 српски динари дневно (околу 47 до 126 македонски денари), зависно од категоријата на туристичкото место.
Според објавеното во „Службен гласник“, за туристичките места од прва категорија највисокиот износ на таксата ќе биде 240 динари (околу 126 денари), а најнискиот 190 динари (околу 100 денари).
За туристичките места од втора категорија, таксата ќе се движи од 150 до 200 динари (околу 79 до 105 денари).
Во местата од трета категорија, најнискиот износ ќе биде 110 динари (околу 58 денари), а највисокиот 170 динари (околу 89 денари).
За туристичките места од четврта категорија, таксата ќе изнесува од 90 до 140 динари (околу 47 до 74 денари) дневно.
Во Белград, од 15 октомври, туристичката такса ќе се зголеми од досегашните 160 на 240 динари дневно (од околу 84 на 126 денари).
Одлуката за зголемување ја усвои Собранието на градот на почетокот на октомври.
Новите износи значат дополнителен трошок за туристите кои престојуваат во Србија, а точната сума ќе зависи од категоријата на туристичкото место.
