Гувернерот на американската сојузна држава Тенеси, Бил Ли, најави иницијатива Меѓународниот аеродром во Нешвил да го носи името на познатата американска кантри-пејачка Доли Партон.
Иницијативата се појави по смртта на Доли Партон на 25 август и бројните повици на овој начин да ѝ се оддаде почит. Петицијата досега ја потпишале повеќе од 150.000 луѓе.
Ли соопшти дека оваа недела разговарал со претставници на семејството и тимот на Доли Партон за предлогот и дека тие изразиле благодарност поради големата поддршка, наведувајќи дека се трогнати од идејата и отворени за продолжување на разговорите.
„Извонредниот живот на Доли Партон засекогаш е вткаен во ткивото на нашата држава. Од нејзиниот дом во планините на источен Тенеси до светските сцени, Доли со себе го носеше духот на волонтерството“, изјави Ли, пренесува телевизијата WKRN, филијала на ABC за подрачјето на Нешвил.
Тој оцени дека Меѓународниот аеродром во Нешвил, како место преку кое Тенеси го пречекува светот, е соодветно место да го носи името на една од најсаканите жителки на оваа сојузна држава.
Според него, името на Доли Партон би било симбол на нејзината музика, великодушност, вера и добрина.
Претставникот во државниот парламент на Тенеси, Тод Ворнер, изјави дека законодавците не можат да поднесуваат предлози на закони пред ноември, но дека планира предлогот за преименување на аеродромот да го упати до Генералното собрание на Тенеси.
„Доли ги сакаше децата, ги сакаше луѓето. Таа беше двигател на економијата на државата и кралица на кантри музиката. Не гледам зошто ова не би можеле да го направиме во Тенеси и да го преименуваме аеродромот по Доли Партон, жена која направи толку многу за оваа држава, но и за целата земја“, рече Ворнер.
Петицијата го повикува гувернерот и тројцата членови на Претставничкиот дом на Тенеси да ја започнат постапката за промена на името, а до петокот собра повеќе од 150.000 потписи.
Предлогот го поддржува и претседателот и извршен директор на Управата на аеродромот „Метрополитен Нешвил“, Даг Кројлен, кој го опиша аеродромот како „влезна врата на Музичкиот град“ и истакна дека наследството на Доли Партон нè потсетува дека Нешвил својата посебност ја должи на способноста да ги пречека луѓето од сите општествени слоеви.
За преименувањето, заедно со важечката политика за именување на аеродромите, ќе се разговара на седницата на Управата на аеродромот „Метрополитен Нешвил“ на 17 септември.
Пред аеродромот официјално да може да го добие името Доли Партон, предлогот мора да помине низ предвидената постапка за одобрување, а допрва треба да се одлучи и на кој начин нејзиното име ќе биде вклучено во официјалниот назив.
Покрај предлогот за преименување на аеродромот, еден пратеник во Собранието на Тенеси најави и закон со кој 25 септември би бил прогласен за „Ден 9 до 5“, според една од најпознатите песни на Доли Партон.
Американската пејачка Доли Партон, позната како „кралицата на кантри музиката“, почина на 25 август на 80-годишна возраст.
Доли Партон освои 11 награди „Греми“, меѓу кои и наградата за животно дело, пренесува Ројтерс.
Со класичните песни, меѓу кои се „Coat of Many Colors“, „Jolene“ и „I Will Always Love You“, таа стана една од најпродаваните уметници на сите времиња, со повеќе од 100 милиони продадени плочи.
