Компанијата „Фереро“ повлече од продажба ограничена серија „Нутела“ мафини во Германија, откако било утврдено дека одредени производи можат да содржат ситни метални фрагменти, соопшти Германската канцеларија за заштита на потрошувачите и безбедност на храната (BVL).
Според соопштението, повлекувањето се однесува само на ограничена серија на производот, додека останатите производи на „Фереро“ не се опфатени со оваа мерка.
Надлежните предупредуваат дека металните фрагменти во храната можат да предизвикаат повреди на устата и грлото, а во потешки случаи и задушување.
„Во случај на повреда или отежнато дишење, веднаш треба да се побара медицинска помош“, се наведува во предупредувањето.
На потрошувачите им се препорачува под никакви околности да не го консумираат производот.
Од „Фереро“ информираат дека спорната серија била во продажба во пекарници, супермаркети и хипермаркети низ Германија во периодот од 16 до 25 јуни.
Засега не е познато како металните фрагменти завршиле во производот.
Компанијата не прецизираше каде потрошувачите можат да ги вратат производите, ниту како ќе се врши повратот на средствата, но наведе дека постои можност за нивна замена со нов производ.
