Прага е прогласена за најдобар европски град за самостојни патувања, според листата на дестинации што нудат поволни услови за туристите кои патуваат сами. Меѓу десетте најдобро рангирани градови се најдоа и Краков, Истанбул, Лисабон и Берлин.
Чешката престолнина има и осма највисока оценка за безбедност меѓу градовите опфатени со истражувањето. Во Прага има речиси 30 хостели, со просечна оценка од 8,7 од гостите.
Второто место го зазеде полскиот Краков, кој воедно е вториот најевтин град на листата. На третата позиција е Истанбул, каде што се забележани најниски цени за кревет во хостелско сместување. Ноќевање чини околу 16 евра, а градот има повеќе од 10.000 ресторани.
Во првите десет се најдоа и Лисабон, Гдањск, Берлин, Порто, Севилја, Барселона и Рига.
На дното на листата е Цирих, каде што просечните дневни трошоци за сместување изнесуваат 168,13 евра, што е највисока сума меѓу анализираните градови. Швајцарскиот град има и втора највисока цена на храната и трета највисока цена на превозот. Пред него, на последните позиции се Рекјавик и Венеција.
Според процените на компанијата „Радикал сторејџ“, просечните дневни трошоци во десетте најслабо рангирани градови изнесуваат 252 евра, речиси 100 евра повеќе од просекот во десетте најдобро рангирани, каде што изнесуваат 153 евра.
Меѓу градовите на долниот дел од листата се и Архус, Келн, Женева, Франкфурт, Ница, Марсеј и Даблин.
Во меѓувреме, авиокомпанијата „Виз ер“ најави директна линија меѓу Сараево и Прага од 18 декември, додека летовите до Берлин, кој е на шестото место на листата, треба да започнат на 3 декември, соопштија од Меѓународниот аеродром во Сараево.
