Принцот Хари е во преговори за снимање документарен филм посветен на неговата мајка, принцезата Дајана, по повод 30-годишнината од нејзината смрт, која ќе се одбележи на 31 август 2027 година.
Според британскиот „Телеграф“, Хари сака преку проектот да ѝ оддаде почит на својата мајка, а веќе стапил во контакт со неколку нејзини блиски пријатели и роднини. Се очекува проектот да биде понуден на „Нетфликс“.
Меѓу луѓето од кои Хари побарал учество бил и нејзиниот брат, Чарлс Спенсер, но тој наводно одбил да биде дел од телевизиски проекти посветени на неговата сестра.
Спенсер во своите нови мемоари „Swan Song: Diana, My Sister“ пишува дека не сака да учествува во проекти во кои би бил само соговорник во приказна со однапред утврдена насока. Тој наведува дека животот на Дајана со текот на годините бил проследен со бројни митови и невистини и дека нејзината приказна треба да биде раскажана искрено, дури и кога тоа е непријатно за другите.
Во книгата Спенсер пишува и за разговорот со кралот Чарлс Трети по смртта на Дајана. Според неговото тврдење, тогашниот принц од Велс му рекол дека наскоро ќе ја заборават. Бакингемската палата ги отфрлила овие тврдења, оценувајќи дека тагата за сестрата може да влијае врз сеќавањата.
Во меѓувреме, Хари повторно престојува во Лондон. Тој неодамна присуствуваше на годишните хуманитарни награди „WellChild“, каде што зборуваше и за своите деца, принцот Арчи и принцезата Лилибет, како и за нивното постепено прифаќање на некои британски традиции.
