Принцот Хари повторно се појави во јавноста во Лондон, каде што присуствуваше на првите „Invictus Spirit Awards“, настан организиран во рамките на движењето „Инвиктус“.
Хари пристигна сам на свеченоста во „Old Royal Naval College“ во Гринич, облечен во свечен костум и со своите воени медали. На настанот се сретна со припадници на заедницата на „Инвиктус“, ветерани и гости.
Запрашан како се чувствува по враќањето во Британија, Хари кратко одговорил: „Добро. Убаво е повторно да се биде на британско тло“.
Меган Маркл не присуствуваше на свеченоста. Според информациите објавени во медиумите, таа во овој период е посветена на приспособувањето на нивните две деца кон животот и училиштето во Британија. Децата неодамна го смениле училиштето по само два дена, откако нивниот безбедносен тим проценил дека патувањето и сообраќајот создаваат дополнителни ризици за нивната заштита.
„Invictus Spirit Awards“ ги организира фондацијата „Инвиктус гејмс“, која Хари ја основаше во 2014 година. Првото издание на наградите беше посветено на луѓето кои придонесуваат за движењето, како и на поранешни и активни припадници на воените служби кои се соочиле со повреди или заболувања.
Свеченоста имаше и хуманитарен карактер. На настанот биле собрани 1.667.985 фунти, кои ќе бидат наменети за програмите на фондацијата за опоравување на ранети, повредени и болни припадници на воените служби и ветерани.
Хари истиот ден присуствувал и на настан организиран од „Save the Children“ и „Imperial College London“. Неговите јавни активности во Британија ќе продолжат и во следниот период, а подоцна овој месец се очекува да присуствува и на доделувањето на наградите „WellChild“, чиј покровител е од 2007 година.
