Во Србија започна производството на првите хуманоидни роботи, со учество на кинески експерти и локални работници и инженери. Роботите се произведуваат како машини со општа намена, а потоа, со помош на вештачка интелигенција и соодветни програми, се приспособуваат за различни задачи.
Супервизорот на производството, Дејан Бабиќ, претходно поминал обука во кинескиот град Џјасинг, каде што 30 дена се запознавал со технологијата и процесот на производство.
Највисокиот модел е висок 173 сантиметри и тежи 55 килограми, додека помалиот е висок 130 сантиметри и тежи 35 килограми. Покрај хуманоидните роботи, компанијата произведува и роботски кучиња.
Во почетната фаза роботите ќе се користат во индустријата, а плановите се подоцна технологијата да биде приспособена и за употреба во домаќинствата. Производниот капацитет е планиран на околу 3.000 роботи годишно, главно наменети за европскиот пазар.
Компанијата планира и изградба на Индустриски парк за роботика во Инѓија, инвестиција вредна околу 200 милиони евра, со која се очекува отворање на повеќе од 200 работни места со понатамошното проширување.
Компанијата досега традиционално работела во производството на автомобилски компоненти, но сега се насочува и кон напредно интелигентно производство, кое опфаќа сензори, батерии, мотори, чипови, софтвер и вештачка интелигенција.
