Connect with us

#ФАЦИ

Прво бев маж на Анче, па зет на Петре Прличко, па татко на Тања и на Игор. А што сум јас? Ти си маестро, маестро мој: Комеморација за Александар Џамбазов

Денеска во фоајето на НОБ  се одржа комеморацијата за композиторот и диригент маестро Александар Џамбазов. Започна со едноминутна музика, место едноминутно молчење со кое обично започнуваат класичните комеморации.

 

Етномузикологот и музички новинар Бранка Костиќ-Марковиќ  ги водеше присутните низ животот и делото на легендарниот маестро Џамбазов. Таа ја нарече комеморацијата промоција на делото на Џамбазов.

„Првпат настапив на ‘Златно славејче’ во 1984 година, а потоа, следната година пеев како солист и долги години бев дел од хорот со кој диригираше чичко маестро Џамбаз. Ме викаше неговото златно гавранче“, рече таа, која му беше пријателка и близок соработник.

Неговиот син, шоуменот и актер Игор Џамбазов, им се заблагодари на сите што дојдоа да оддадат почит на неговиот татко.

„Целата љубов што вие ја чувствувате за вашиот омилен чичко Ацо, маестро Џамбаз, ние ќе ја продолжиме да ја чуваме. Цел живот живееше во сенка, но беше најголемиот генијалец во нашето семејство. ‘Прво бев маж на Анче, па зет на Петре Прличко, па татко на Тања и на Игор. А што сум јас? Ти си маестро, маестро мој’“, рече Игор.

Покрај Игор и Тања, на комеморацијата беа и претседателот Стево Пендаровски и премиерот Димитар Ковачевски. Дојде и градноначалничката на Скопје Данела Арсовска, како и поранешниот министер за култура Роберт Алаѓозевски. Тука беше и Славе Димитров, Благоја Чоревски со сопругата.

 

Свој збор за време на комеморацијата зедоа и композиторите Јане Коџабашија и Стојан Стојков.

„Бевме пријатели долги години, разговорите по телефон секогаш ни траеја по два часа, и секогаш ми кажуваше нешто во доверба. Се грижеше за состојбата на и за творештвото на македонските автори“, рече Стојков.

Последедна зборуваше  претседателката на ЗАМП, Антоанета Токовска-Котевска, која со насолзени очи раскажа за своето време со маестро Џамбазов.

„Господин не се правиш, господин се раѓаш. Му благодарам што ме донесе на сцената и што ми го одреди музичкиот пат. Ме воведе на сцената како славејче, но засекогаш ќе останам неговото златно гавранче“, рече таа, која ја испеала познатата детска песничка „Едно маче“.

Присутните можеа да ги напишат последните зборови кон маестро Џамбазов во отворената книга на жалост, а меѓу нив беа и актерката Весна Бејби Петрушевска, пејачите Александар Тарабунов и Пере од „Нокаут“, режисерот Гоце Трајковски и многу други познати личности.

Маестро Џамбазов ненадејно почина на 25 јануари. Беше погребан денеска во 12:00 часот во градските гробишта во Бутел.

Џамбазов ќе биде запомнет по неколку стотини композиции и аражнмани и со 1.450 студиски снимки со голем број ансамбли, секако најмногу со оние во рамките на Македонската радио-телевизија. Во текот на животот доби голем број стучни, домашни и меѓународни награди и општествени признанија, меѓу кои 11-октомвриската награда, наградата „13 ноември“, наградата за животно дело „Трајко Прокопиев“ на Сојузот на композиторите на Македонија.

Текст и фото: Марија Прличкова 

 

Извор: Репортер.мк

#ФАЦИ

Првпат во животот облеков фармерки откако ослабев 60 килограми: Пејачката Ивона Јо среќна и посветена на музиката 

Пејачката Ивона Јовановиќ ослабе 60 килограми и првпат во животот облече фармерки. Шест месеци по операцијата на желудникот вели дека конечно е задоволна кога ќе се погледне во огледало.

„Веќе ја немам онаа лажна самодоверба. Кога се затворивме во пандемијата, дознав многу работи за себе, на пример дека се прејадував не затоа што сум била гладна, туку за да го скријам стресот. Денес животот ми е сменет, вежбам јога, медитирам, посветена сум на пеењето и настапите и конечно сум вистински среќна“, вели Ивона во интервјуто на „Репортер“.

Се дружевме во Куманово, градот каде што е родена и живее. И додека ни ги откриваше омилените места на нејзиниот град разговаравме за сè. За музиката, настапите во „Ѕвездите на Гранд“, па и онаа болна тема, психичките проблеми кои со години ја мачеле поради дебелината.

„Никој не ме прашуваше како сум. Ме покажуваа со прст и коментираа дека сум дебела. Кога објавив слики на кои носам свилен фустан, луѓето мислеа дека промовирам гојазност. Јас тоа го направив за себе. Разговорите со психолог многу ми помогна да ги надминам проблемите и да сфатам дека имам многу квалитети за кои не бев свесна“, вели Ивона.

Од дете имала проблем со дебелината, Баба ѝ ја учела да носи широка облека за да ѝ го покрива телото. Денес, кога тоа е минато, Ивона вели дека веќе не се лути, ниту на родителите ниту на баба ѝ.

„Им простив, затоа што само така можев да тргнам напред и да ги надминам сите психолошки проблеми“, искрена е пејачката.

Низ сите овие години музиката ја водела напред. Зад неа е и бендот со кој ни покажа како се пее. А, кога е на јога, освен што го затега телото, си ја смирува и душата. Помеѓу музиката и јогата, секогаш наоѓа време за дружење и чаша вино со нејзиниот најдобар пријател, пејачот Марио Арангеловски. Марио го запознала на аудиција за ‘Идол’. Иако не се сакале, денес се најдобри другари.

„Баба му Ратка многу ме сака и сака да ѝ бидам снаа. Марио лаже дека не сме љубители на алкохолот. И двајцата  сакаме да испиеме чаша добро вино“, рече Ивона. Поради алкохол настанал и најсмешниот клип за јутјуб што го снимиле и бидејќи пијани глумеле модно жири, клипот никогаш не го објавиле.

Дали им било непријатно да се бакнуваат пред камери, како еден на друг си биле лоша среќа во „Гранд“, ама и зошто Ивона не ѝ пееше пратечки вокали на Калиопи на Евросонг. Тука се и муабетите за детството , за операцијата што ја чека пред крајот на годината, песната што наскоро ќе ја снима во Белград, како од 5ХЛ стигна до Л и зошто сака да отвори бутик на плус сајз девојки… гледајте го видеото.

Андријана Јовановска

 

Извор: Репортер.мк

Continue Reading

#ФАЦИ

(Видео) Геј пар се венчаше со евровизиската песна на Васил Гарванлиев

Евровизиските фанови Тој и Гој, кои имаат свој Јутјуб канал, биле толку многу воодушевени од песната Here I Stand што Васил Гарванлиев ја пееше лани на Евросонг, што ја избрале како главна песна на нивната свадба. Тие ова го открија во видеото во кое ги споделија своите впечатоци од песната Circles со која Андреа годинава ќе ја претставува Македонија на музичкото натпреварување.

„Се сеќавате ли каква реакција имав лани кога првпат ја слушав песната на Васил? Навивав за него да успее, и знам дека луѓето велат дека песната е малку лигава, ла, ла, ла, но ако ја слушнете само инструменталната верзија на песната, ќе сфатите дека е прекрасна. Прекрасна. Таа беше една од главните песни на нашата венчавка. Васил требаше да пее во финалето. Песната ја гледаме како вистински подарок од Васил за свадбата. И иако не сме го запознале, знаеме дека ќе го обожаваме и кога ќе го сретнеме“, велат Тој и Гој во видеото.

Инаку, песната Here I Stand беше промовирана пред точно една година, а ја претставуваше Македонија на Евросонг во Ротердам. За да ја одбележи годишнината, пред неколку дена, Васил објави десет ремикси на песната кои ги направија диџеи од целиот свет.

„Сега тие ја пуштаат Here I Stand во клубовите и дискотеките. Песната почнува да грми на журки“, рече Васил за „Репортер“.

Извор: Репортер.мк

Continue Reading

#ФАЦИ

Андреа со песната „Circles“ ќе ја претставува Македонија на Евровизија 2022

Вечерва беше избран нашиот евровизиски претставник, и победата ја однесе Андреа со песната „Circles“.

Пред камерите се претставија шесте кандидати за кои народот имаше можност да гласа изминативе денови. Кали, Лара, Виктор, Јон, Андреа и Рис Флауер се релативно млади музичари, кои претходно беа избрани на конкурсот кој го распиша МРТ.

„Пред сè, благодарам Македонија! Ветувам дека ќе направам сè да ги оправдам вашите очекувања. Честитки за сите учесници во национланиот избор, бевте тешка конкуренција Оваа шанса за мене е одговорност, како професионална, така и лична. Поддршката од страна на публиката и медиумите ми даде голем поттик овие две недели. Масевски, благодарам за Circles! Останува да продолжиме со полна пареа со подготовките за Евровизија и достојно да ја претставиме Македонија во Торино“, напиша Андреа на социјалните мрежи.

Избирањето се одвиваше по пат на онлајн гласање, а гласовите од јавноста сочинуваа 50 проценти, додека останатите 50 проценти беа доделени од страна на стручно странско жири.

Continue Reading
Advertisement

Facebook

Facebook

Трендинг

Copyright © Mediaset.mk / 2020

error: