Авиокомпанијата Рајанер ги потсети патниците дека од вторник, 10 ноември, предавањето на багажот на сите аеродроми на кои лета ќе се затвора 60 минути пред планираното полетување, наместо досегашните 40 минути.
Промената компанијата ја најави уште во април, а денес повторно ги потсети патниците на неа преку соопштение. Оние што предаваат багаж на аеродромот ќе мора да го направат тоа најдоцна еден час пред полетувањето.
Од Рајанер наведуваат дека дополнителните 20 минути ќе им овозможат на патниците што предаваат багаж, а кои сочинуваат околу 20 отсто од вкупниот број патници, да имаат повеќе време да ги поминат безбедносната и пасошката контрола и да стигнат до излезот пред почетокот на качувањето во авионот, особено во периоди кога има поголеми гужви на аеродромите.
Како што наведуваат, промената треба да го намали и бројот на патници кои ги пропуштаат летовите поради чекање на безбедносната или пасошката контрола.
Останатите 80 отсто од патниците, кои не предаваат багаж, нема да бидат засегнати од промената. Тие и понатаму ќе се чекираат онлајн пред да пристигнат на аеродромот и потоа директно ќе одат на безбедносната контрола, па кон излезот за качување во авионот.
„Ги потсетуваме патниците кои ја користат услугата за предавање багаж на аеродромот да пристигнат навреме и да се чекираат и да го предадат багажот пред затворањето на шалтерите, односно 60 минути пред полетувањето“, порача директорот за маркетинг на Рајанер, Дара Брејди.
