Компанијата „Мета“, сопственик на Фејсбук, Инстаграм и Вотсап, е казнета со рекордни 25 милијарди долари поради доведување на јавноста во заблуда за начинот на кој ги користи и споделува податоците на корисниците. Одлуката ја донел суд во американската сојузна држава Ново Мексико, пренесува Би-Би-Си.
По судењето, поротата утврдила дека компанијата повеќе од 40 милиони пати ги прекршила законите на оваа сојузна држава. Обвинителите тврдат дека нејзините постапки влијаеле врз околу два милиона жители.
Судската постапка се однесувала на тврдењата дека „Мета“ со години ја доведувала јавноста во заблуда за користењето и споделувањето на личните податоци, како и за спроведувањето на правилата против говорот на омраза.
Главниот правен застапник на компанијата, Си Џеј Махони, најави жалба, оценувајќи дека ваквата одлука практично го оневозможува работењето на „Мета“ во Ново Мексико. Обвинителите барале казна од 40 милијарди долари, додека одбраната сметала дека секоја казна повисока од 3,4 милијарди долари би била противуставна.
Случајот е поврзан и со скандалот „Кембриџ Аналитика“, во кој податоци на милиони корисници на Фејсбук биле користени за политичко советување, вклучително и за активности поврзани со претседателските избори во САД во 2016 година.
Ова не е првпат компанијата да биде казнета поради начинот на кој постапува со податоците на корисниците. Американската Федерална комисија за трговија во 2019 година ѝ изрече казна од пет милијарди долари, додека Ново Мексико годинава ја казни со речиси една милијарда долари поради доведување на јавноста во заблуда за безбедноста на социјалните мрежи за децата.
И покрај судските постапки, „Мета“ планира годинава да инвестира најмалку 135 милијарди долари во различни проекти, главно поврзани со вештачката интелигенција.
Компанијата во периодот од јули до септември остварила приходи од 64,5 милијарди долари, додека чистата добивка изнесувала 9,8 милијарди долари.
