Реткиот розов дијамант „Гран Конде“, украден пред речиси 100 години, повторно ќе биде изложен во Франција, во музејот Конде во замокот Шантији, каде што посетителите ќе можат да го видат до 3 јануари.
Дијамантот од девет карати, со облик на круша, бил украден во октомври 1926 година, кога крадци провалиле во замокот и го сокриле во издлабено јаболко. Неколку недели подоцна, каменот бил пронајден откако гладна собарка во хотелот каде што престојувале крадците го загризала јаболкото.
Директорот на музејот, Матје Делдик, изјавил дека приказната звучи неверојатно, но дека за неа тогаш опширно пишувале весниците. Новата изложба ќе вклучува научни анализи и досега невидени архивски документи за историјата на дијамантот и неговата кражба.
Природните розови дијаманти се исклучително ретки и на аукции достигнуваат цени од десетици милиони долари. Според аукциската куќа „Сотби“, рекордната цена за ваков дијамант изнесувала 71,2 милиони долари во 2017 година.
Точното потекло на „Гран Конде“ сè уште не е познато. Според податоците на замокот Шантији, дијамантот првпат бил споменат во 1740 година, во пописот на имотот на Луј Анри де Бурбон, принцот од Конде.
