Подрачјето околу Колосеумот е прогласено за „црвена зона“ поради безбедноста на граѓаните и туристите, како и поради зголемувањето на уличниот криминал во центарот на Рим.
По неколку насилни инциденти и вонредни полициски контроли во последните недели, подрачјето околу Колосеумот, Римскиот форум и ридот Келио официјално стана „црвена зона“ во италијанската престолнина, пренесува Анса.
Одлуката стапи во сила на 24 август и ќе важи четири месеци, а нејзината цел е зајакнување на безбедноста во одредени области кои се карактеризираат со деградација и криминал.
Во одлуката, римскиот префект Ламберто Џанини укажува на постоењето подрачја погодени од предаторски криминал и трговија со дрога.
„Овие дела првенствено ги вршат групи млади лица со потекло надвор од ЕУ“, се наведува во одлуката.
Како фактор кој придонесува за ваквите инциденти се наведува и отворањето на метро-станицата „Рома Колосео“ на линијата Ц, која го поврзува историскиот центар со источниот дел на Рим.
Како врв на инцидентите е издвоен настанот од 1 јули годинава, кога за време на нелегална забава на плоштадот кај Колосеумот, група од околу 50 лица кои не се државјани на ЕУ им пружила отпор на локалните полицајци и ги опколила.
Во инцидентот полесно биле повредени двајца карабинери.
Истовремено, „црвената зона“ околу станицата Термини е проширена.
Мерките се воведени со цел да се зголеми полициското присуство и да се спречат нови инциденти во едни од најпосетуваните туристички подрачја во италијанската престолнина.
