Хуманоидните роботи во Кина веќе не се тестираат само со одење и трчање, туку мора да извршуваат задачи од секојдневниот живот. На вторите Светски игри на хуманоидни роботи во Пекинг, машините се натпреваруваат во чистење домови, местење кревети, носење багаж и распоредување книги во библиотеки.
На натпреварувањето учествуваат 2.056 роботи од 666 тимови од 16 земји, што е речиси четири пати повеќе од минатогодишното издание. Најголем дел од учесниците се од Кина.
Во домашните задачи, роботите треба да чистат, да пренесуваат и да перат облека, а во хотелите да носат багаж, да дополнуваат резерви и да местат кревети. Во библиотеките, пак, треба да ги собираат вратените книги и правилно да ги распоредуваат на полиците.
Особено се оценува нивната самостојност – роботите губат поени ако се судрат со предмети, испуштат нешто или имаат потреба од човечка помош.
Кина со ова натпреварување сака да покаже дека хуманоидните роботи можат да се применуваат во реални услови, но нивната висока цена сè уште е една од главните пречки за масовна употреба.
