Роуан Аткинсон повторно ќе ги оживее своите најпознати ликови, Мистер Бин и Блекедер, на лондонскиот Вест Енд, во новото шоу „Роуан во живо“.
За британскиот актер и комичар ова ќе биде прво скеч-шоу на Вест Енд по цели 40 години. Шоуто ќе има само 30 изведби, од 8 февруари до 13 март 2027 година, во театарот „Џилијан Лин“ во Лондон.
Покрај познатите скечеви и ликови, Аткинсон ќе изведува и сосема нов материјал.
„Поминаа 40 години откако последен пат направив комично шоу на Вест Енд. Помислив дека би било забавно повторно да ги изведам скечевите со кои почна сè за мене и од кои произлегоа моите најпознати ликови“, изјави 71-годишниот Аткинсон.
На новиот материјал работи со својот долгогодишен соработник Ричард Кертис, како и со Бен Елтон, еден од авторите на „Блекедер“.
Аткинсон го создаде Мистер Бин на сцената во 1980-тите, пред ликот да стане светски познат преку телевизиската серија и филмовите во 1990-тите. Подоцна Мистер Бин доби и анимирана серија, а Аткинсон повторно го играше ликот на церемонијата на отворањето на Олимписките игри во Лондон во 2012 година.
Актерот има и богата театарска кариера. Во 2009 година беше номиниран за наградата „Оливие“, а последен пат настапи на Вест Енд во 2013 година.
