Русија од денеска започнува со масовна примена на дигиталната рубља, со што националната валута добива и трет облик, покрај готовината и средствата на банкарските сметки. Граѓаните преку апликациите на најголемите банки ќе можат да отворат дигитален паричник, да плаќаат во продавници и да префрлаат средства на други лица.
Дигиталната рубља не е криптовалута, туку ја издава Централната банка на Русија и има иста вредност како обичната рубља. Средствата се чуваат во дигитален паричник на платформата на централната банка, а корисниците до нив пристапуваат преку своите банки.
Секој граѓанин може да има еден дигитален паричник, до кој може да пристапува преку повеќе банкарски апликации. На почетокот системот ќе го поддржат 12 системски значајни банки, кои опфаќаат повеќе од 80 отсто од пазарот на плаќања.
Месечно може да се префрлат до 300.000 рубљи од банкарска сметка во дигиталниот паричник, додека потоа нема ограничување за трошењето или преносот на средствата. За граѓаните трансакциите ќе бидат бесплатни, но дигиталната рубља нема да носи камата и нема да може да се користи за штедење или добивање кредит.
Користењето на системот засега е доброволно. Руската централна банка нагласува дека дигиталните паричници нема да се отвораат автоматски и дека, без согласност на граѓаните, платите или државните надоместоци нема да им се исплаќаат во дигитални рубљи.
Системот, сепак, отвора и прашања околу приватноста, бидејќи трансакциите ќе минуваат преку единствена платформа на централната банка, што овозможува следење на историјата на преносите.
Во меѓувреме, Европската централна банка работи на дигиталното евро. Планот е тоа да биде дополнителен облик на европската валута, без да ги замени готовината или банкарските сметки.
За разлика од рускиот модел, дигиталното евро е планирано да овозможи и плаќања без интернет, а ЕЦБ најавува и повисоко ниво на приватност кај ваквите трансакции. Предвидено е да постои и ограничување на износот што граѓаните ќе можат да го чуваат во дигитален паричник, со цел да се заштити стабилноста на комерцијалните банки.
Доколку законската рамка биде усвоена во текот на 2026 година, тестирањето на дигиталното евро би можело да започне во втората половина на 2027 година, а неговото можно воведување се очекува околу 2029 година.
