Потрошувачите би можеле да се соочат со нов бран поскапувања на електронските уреди, откако аналитичарите предупредија дека кризата на пазарот на мемориски чипови ќе продолжи и во наредниот период.
Според прогнозите на инвестициската банка „Џеферис“, цените на меморијата во третиот квартал од 2026 година би можеле да пораснат за 40 до 50 проценти во споредба со тековниот квартал. Дополнително, во последниот квартал од годинава се очекува уште едно зголемување од 30 до 40 проценти.
Аналитичарите предвидуваат дека во текот на 2027 година цените на мемориските компоненти ќе продолжат да растат, што би можело значително да влијае врз цените на паметните телефони, лаптопите и таблетите.
Истражувачката компанија „Гартнер“ проценува дека цените на DRAM и SSD-меморијата до крајот на 2026 година би можеле да пораснат за дури 130 проценти. Како последица на тоа, просечните цени на компјутерите би можеле да се зголемат за 17 проценти, а на паметните телефони за 13 проценти, во споредба со 2025 година.
Тоа значи дека телефон кој денес чини 1.000 долари би можел да поскапи за дополнителни 130 долари.
Од „Гартнер“ предупредуваат и дека сегментот на поевтини компјутери, со цена под 500 долари, би можел речиси целосно да исчезне до 2028 година, бидејќи производителите ќе имаат сè помал простор за покривање на растечките трошоци.
Дополнителен притисок врз пазарот создава и фактот што голем дел од производните капацитети за меморија веќе се резервирани преку долгорочни договори со големите технолошки компании, што остава помалку компоненти достапни за поширокиот пазар на потрошувачка електроника.
Експертите оценуваат дека зголемената побарувачка поврзана со развојот на вештачката интелигенција ќе продолжи дополнително да врши притисок врз производството и цените во следните години.
