Компанијата за вештачка интелигенција xAI се соочува со сериозни кадровски потреси, откако и последните двајца коосновачи ја напуштија фирмата, оставајќи го Илон Маск практично без основачки тим.
Според информации објавени од Business Insider, Мануел Кроис и Рос Нордин, кои беа последните активни коосновачи во компанијата, ја напуштиле xAI во текот на изминатите денови.
Претходно, речиси сите од вкупно 11 коосновачи веќе ја напуштиле компанијата, што укажува на длабоки внатрешни проблеми во функционирањето и развојот на проектот.
Кроис го предводел тимот за преттренинг на моделите, додека Нордин важел за еден од најблиските соработници на Маск, кој претходно работел и во Tesla и бил вклучен во реструктурирањето на X.
Самиот Маск неодамна призна дека xAI „не бил добро поставен од самиот почеток“ и дека компанијата сега се „гради од темел“.
Во меѓувреме, xAI е интегрирана под пошироката корпоративна структура на SpaceX, заедно со X, во период кога се шпекулира за потенцијален излез на берза.
Развојот на настаните отвора прашања за стабилноста и иднината на еден од најамбициозните проекти на Маск во областа на вештачката интелигенција.
