Родителите од генерацијата Икс, кои ги воспитуваа своите деца во период на големи технолошки и општествени промени, денес сметаат дека некои свои воспитни постапки би ги промениле. Иако се труделе да им го дадат најдоброто, со текот на годините сфатиле дека во одредени ситуации биле премногу заштитнички настроени, а на други работи не им посветувале доволно внимание.
Според порталот „YourTango“, постојат седум работи за кои родителите од оваа генерација денес жалат.
Првата е недоволната отвореност во разговорите за парите. Многумина пораснале во семејства во кои ретко се зборувало за финансии, па истиот пристап го примениле и со своите деца. Денес сметаат дека требало порано да ги научат за штедењето, долговите и управувањето со домашниот буџет.
Втората работа е ограничувањето на детската слобода. Иако самите како деца поминувале многу време надвор без постојан надзор, кога станале родители, често претерале со контролата. Сега сметаат дека требало да им дозволат на децата повеќе самостојност и можност да учат од сопствените грешки.
Жалат и што им го организирале речиси целото слободно време преку училишни и воннаставни активности. Веруваат дека требало да им остават повеќе простор за сопствени интереси, досада и самостојно организирање на обврските.
Многумина признаваат и дека премногу се посветиле на родителството, занемарувајќи ги сопствените интереси, хобија и амбиции. Денес сметаат дека требало да задржат повеќе време за себе и да им покажат на децата колку е важно да имаат сопствен живот надвор од семејните обврски.
Како петта работа ја издвојуваат претераната загриженост поради детските грешки. Наместо постојано да ги контролираат и да очекуваат проблеми, денес би имале повеќе доверба во децата и би поттикнувале отворени разговори.
Исто така, сметаат дека требало почесто да им дозволуваат самостојно да се справуваат со проблемите, разочарувањата и неуспесите, наместо родителите да ги решаваат сите тешкотии наместо нив.
Последната работа е недоволното поставување правила за користење на технологијата. Во време кога дигиталниот свет бил релативно нов, многу родители не биле доволно запознаени со неговите ризици. Денес би посветиле повеќе внимание на времето пред екраните, содржините што ги следат децата и нивната безбедност на интернет.
