Тајванското обвинителство поднесе обвинение против девет лица осомничени за незаконски извоз на сервери за вештачка интелигенција во Кина. Меѓу обвинетите се и вработени во технолошките компании Nvidia и Super Micro, објави „Ројтерс“.
Истрагата била започната годинава поради сомневања дека во Кина биле извезувани сервери опремени со чипови на Nvidia, кои се предмет на американски извозни ограничувања. САД уште во 2022 година воведоа забрана за продажба и извоз на напредни полупроводници во Кина.
Обвинителството од пристанишниот град Келунг соопшти дека осомничените биле целосно запознаени со строгите интерни правила за контрола на извозот што ги применуваат Nvidia и Super Micro.
Според обвинителите, деветтемина на различни нивоа се здружиле со цел да остварат голема финансиска корист и незаконски извезувале напредни сервери. Со тоа, како што наведува обвинителството, биле зголемени трошоците за усогласување со регулативите и сериозно бил нарушен меѓународниот углед на Тајван.
Имињата на обвинетите засега не се објавени, а Nvidia и Super Micro не дале коментар за случајот.
Тајван во последните години ги заострува контролите врз извозот на напредна технологија, со цел да спречи чувствителното технолошко знаење и опрема да завршат во Кина.
Островот е едно од најважните светски средишта за производство на полупроводници, а неговата индустрија има клучна улога во развојот на технологиите поврзани со вештачката интелигенција. Истовремено, Пекинг го смета Тајван за дел од својата територија, што тајванските власти категорично го отфрлаат.
