Хрватската пејачка Северина објави три нови песни пред концертот што ќе го одржи на 5 декември во „Т Арена“ во Скопје. Музичката трилогија ја најави со песната „Не сум јас виновна“, со дополнителен наслов „Бесчувствителна“.
Пејачката ја опиша песната како емотивна поп-рок композиција, а во најавата се пошегува и со своите долгогодишни судски процеси.
„Како што вели песната, јас не сум виновна. Ова е емотивна поп-рок песна. Мама ми шиеше фустан за на суд, но, за среќа, повеќе немам судења, па, еве, нека го видат фустанот“, рече Северина.
Со изјавата таа се осврна на долгогодишниот судски спор со поранешниот партнер Милан Поповиќ околу родителската грижа за нивниот син Александар. Судскиот спор започна во 2013 година, а во текот на годините беа донесени повеќе одлуки поврзани со живеењето на детето и остварувањето на родителската грижа. Со последната одлука, судот во Сплит повторно им додели заедничко старателство на Северина и Поповиќ.
Режисер на спотот за „Не сум јас виновна“ е Петар Пашиќ, музиката ја потпишува Бојан Васиќ, а текстот е на Даниел Павловиќ.
Северина на 5 декември ќе настапи во „Т Арена“ во Скопје, а билетите за концертот се достапни преку мрежата на „Купи карта“.
