Колумбиската пејачка Шакира не можеше да ги сокрие емоциите за време на последниот концерт во Мадрид, каде што пред повеќе од 55.000 луѓе проговори за тешкиот период низ кој минувала во изминатите недели.
Пејачката во понеделникот, на 12 октомври, ја заврши европската концертна резиденција во шпанската престолнина, по 13 настапи. Последниот концерт, одржан во просторот „Макондо парк“, покрај музичкиот спектакл, беше одбележан и со нејзината емотивна исповед.
„Мислам дека овој месец беше еден од најважните во мојата кариера. Овие концерти во Мадрид за мене се историски“, изјави Шакира.
Сепак, зад професионалниот успех се криеле и лични грижи. Пејачката откри дека минувала низ тежок период поради здравствената состојба на нејзиниот татко, но и поради приватни проблеми за кои не сакаше да открива повеќе детали.
„Овој месец поминав низ тешки моменти поради здравјето на татко ми, но и поради личните проблеми за кои веќе знаете“, им порача таа на присутните.
Според шпанскиот весник „АС“, Шакира била видно емотивна додека зборувала за случувањата во изминатите недели. Таа не прецизираше на кои лични проблеми конкретно мислела.
Пејачката им се заблагодари на обожавателите за поддршката, нагласувајќи дека нивната љубов ѝ помогнала да продолжи со настапите и покрај тешкотиите со кои се соочувала надвор од сцената.
„Благодарение на вас, времето навистина застанува и повторно добивам сила. Со вас уживав како да сум на самиот почеток на кариерата и тоа никогаш нема да го заборавам“, рече таа.
Еден од највпечатливите моменти на вечерта беше кога Шакира му се заблагодари на својот поранешен партнер Антонио де ла Руа, со кого била во врска повеќе од десет години.
Според написот, нивниот однос денес е пријателски, а Де ла Руа бил вклучен и во реализацијата на проектот „Макондо парк“.
„Сакам да му се заблагодарам на човекот кој некогаш ми беше партнер, а денес ми е голем пријател. На мојата сродна душа. Антонио де ла Руа, ти благодарам. Ти благодарам за пријателството“, порача пејачката.
Со тоа, последниот концерт во Мадрид заврши со емотивен момент во кој Шакира отворено призна дека изминатиот период не ѝ бил лесен, истовремено изразувајќи благодарност до луѓето кои ѝ биле поддршка.
