Кучињата можеби не ги разбираат зборовите на ист начин како луѓето, но ново истражување покажува дека нивниот мозок има интересна способност за обработка на говорот. Научниците откриле дека кучињата можат да следат повторувачки обрасци во говорот и да ги користат за да препознаат каде завршува една, а започнува друга говорна целина.
Студијата, објавена во научното списание „Сајенс“, покажува дека кучињата при слушање непрекинат говор можат да им дадат предност на согласките, иако самогласките се акустички поизразени.
Истражувачите Богларка Морваи и нејзините колеги од Универзитетот „Етвеш Лоранд“ во Унгарија спровеле експеримент со 20 возрасни кучиња. Животните слушале снимки со измислени трисложни зборови, додека со електроди била следена електричната активност на нивниот мозок. Истите снимки биле пуштени и на 20 возрасни луѓе.
Говорот бил намерно пуштен без паузи, така што учесниците немале јасен сигнал каде завршува еден збор и започнува друг.
Во еден сет снимки, повторувачките обрасци на согласките ги поврзувале слоговите во измислени зборови. Во друг, истата функција ја имале самогласките, додека во третата снимка слоговите биле измешани без препознатлив образец.
Резултатите покажале дека кога согласките се повторувале според одреден образец, мозочните сигнали кај кучињата се синхронизирале со ритамот на трисложните измислени зборови. Тоа укажува дека нивниот мозок ги следел повторувачките целини во непрекинатиот говор.
Кај снимките во кои зборовите биле дефинирани преку самогласките, ваква јасна реакција на ниво на зборови не била забележана.
Интересно е што и луѓето во истражувањето им дале предност на согласките, но кај нив мозокот појасно ги следел и обрасците создадени од самогласките.
„Она што го направи резултатот особено интересен е фактот дека оваа пристрасност претходно не била забележана кај ниту еден друг вид, дури ни кај приматите, а сепак ја пронајдовме кај кучињата“, изјавиле истражувачките за „Сајенс алерт“.
Научниците разгледуваат две можни објаснувања. Едното е дека ваквата предност на согласките може да бара специјализирани јазични способности, додека другото е дека долгогодишната изложеност на човечки говор им помогнала на кучињата да научат кои звуци носат покорисни информации.
Сепак, истражувањето не покажува дека кучињата ги разбирале зборовите што ги слушале. Зборовите биле целосно измислени и немале конкретно значење. Наместо тоа, резултатите покажуваат дека нивниот мозок може да препознава одредени обрасци во говорот.
Истражувачите испитале и дали раната изложеност на човечки говор има влијание. Кај 11 од кучињата се претпоставувало дека живееле во дом во кој често се зборувало уште пред да наполнат 12 недели, додека девет биле изложени на таква средина подоцна. Кај двете групи била забележана предност на согласките.
Научниците, сепак, предупредуваат дека примерокот бил мал, а за некои од кучињата не била целосно позната нивната историја пред вдомувањето.
Понатамошните истражувања би можеле да покажат кога се развива оваа способност, а споредувањето на кучињата со волците би можело да помогне да се утврди дали таа постоела и пред припитомувањето или се развила во текот на долгото заедничко живеење со луѓето.
