Синот на аргентинската фудбалска легенда Диего Марадона, Диего Армандо Марадона Синагра, изјави дека полуфиналниот натпревар меѓу Аргентина и Англија никогаш нема да биде само спортски дуел, поради историското ривалство меѓу двете земји.
Во интервју за шпанскиот весник „Марка“, Марадона Јуниор истакна дека натпреварите против Англија за Аргентинците секогаш будат спомени на Фолкландската војна, но и на четвртфиналето од Светското првенство во 1986 година, кога неговиот татко ги постигна легендарните голови „Божјата рака“ и „голот на векот“ во победата од 2:1.
„Ова никогаш нема да биде нормален натпревар. Англија игра добро, но мораме да се соочиме со нив и да ги победиме светските шампиони. Ќе биде тежок меч за двете селекции“, изјави Марадона Јуниор.
Иако аргентинскиот селектор Лионел Скалони се обиде да ги намали политичките и историските тензии околу натпреварот, Марадона Синагра смета дека тие и понатаму се присутни.
„Татко ми никогаш немаше да го доживее ова како обичен натпревар. За сите Аргентинци и за сите што го сакаат Марадона, ова е посебен момент. Се враќаат спомените на Фолкландската војна и на луѓето што таму ги загубија животите, како и на она што се случи во 1986 година. Од тогаш ништо не е исто кога играме против Англија“, рече тој.
Марадона Јуниор откри дека не бил роден кога бил одигран славниот натпревар во Мексико во 1986 година, но израснал слушајќи ги приказните на својот татко за тој историски дуел.
Тој упати пофалби и за капитенот на Аргентина, Лионел Меси, кој за првпат во кариерата ќе игра против Англија.
„Никогаш не сум го запознал Меси, но го носам во срцето, како и сите Аргентинци. Тој заслужува да освои уште еден трофеј. Мојот татко беше вонземјанин на фудбалот и не може да се споредува со никого, но Лео заслужува сè. Би сакал повторно да игра финале и да го освои“, изјави Марадона Јуниор.
