„Гугл“ се соочува со критики откако истражувач за безбедност и приватност откри дека прелистувачот „Хром“ без дозвола на корисниците инсталира АИ модел на нивните уреди.
Станува збор за моделот „Gemini Nano“, верзија на вештачката интелигенција на „Гугл“, која работи директно на уредот, наместо преку облак.
Истражувачот Александер Ханф, познат како „The Privacy Guy“, на својот блог наведе дека открил датотека од четири гигабајти со назив „weights.bin“ во директориумот „OptGuideOnDeviceModel“.
„Хром не бара дозвола. Не го известува корисникот за тоа. Дури и ако корисникот ја избрише датотеката, ‘Хром’ повторно ја презема“, напиша Ханф.
Според него, датотеката ги содржи параметрите што му овозможуваат на АИ моделот да функционира.
Откритието предизвика реакции кај корисниците на социјалните мрежи и форумите, каде што многумина го критикуваат „Гугл“ поради недостиг на транспарентност и автоматско инсталирање содржини без согласност.
„Не е проблем само вештачката интелигенција, туку тоа што ‘Гугл’ инсталира што сака без моја дозвола“, напиша еден корисник на „Редит“.
Други, пак, тврдат дека компанијата на овој начин сака вештачки да го зголеми бројот на корисници на своите АИ алатки.
Ханф предупредува и дека ваквото постапување потенцијално може да биде спротивно на европските правила за заштита на лични податоци, вклучително и ГДПР.
Тој објаснува дека преземањето на датотеката се активира ако во „Хром“ се вклучени стандардните АИ функции. За да се спречи повторна инсталација, препорачува рачно исклучување на АИ опциите во поставките на прелистувачот.
„Гугл“ засега нема официјален коментар за обвинувањата.
Во меѓувреме, „Мозила“ најави дека ќе овозможи целосно исклучување на сите нови АИ функции во „Фајрфокс“, додека прелистувачот „Вивалди“ порача дека ќе користи вештачка интелигенција само ако таа не ја нарушува приватноста и независноста на корисниците.
