Слаткаристика синоќа настапи во Лондон во рамките на манифестацијата „Македонски денови на културата 2026“, а по концертот сподели видео од полната сала и атмосферата од настапот.
„Лондон е топ. Фала ви, луѓе“, порача Марко Маринковиќ – Слаткаристика по концертот.
Манифестацијата се одржува по повод 35 години од независноста на Македонија. Покрај Слаткаристика, програмата вклучува настапи на Националниот ансамбл за народни игри и песни „Танец“, бендот „Емигранти“ од Велика Британија и македонски фолклорни друштва од Обединетото Кралство.
По концертот во Лондон, на 16 септември, програмата продолжува на 18 септември во Оксфорд.
Пред настапот, Слаткаристика присуствувал на прием во Лондон, каде што се сретнал со македонската амбасадорка во Обединетото Кралство, Илина Мангова. Раперот сподели фотографии од средбата и се присети на своите почетоци.
„Чест и задоволство ми беше што бев поканет на прием во Лондон и што имав можност да се сретнам со амбасадорката на Република Македонија во Обединетото Кралство. Убавите средби, почитта и доброто претставување на нашата земја секогаш имаат посебно значење.
П. С. Јас сум дете од Ново Лисиче. Некогаш немав ништо во животот освен лист, пенкало и сон. Никогаш не престанав да сонувам… Ве чекам вечер на концерт“, напиша тој пред настапот.
За Слаткаристика годинава е исполнета со активности. На 2 август одржа голем концерт „Слаткаристика и пријателите“ на стадионот „Билјанини Извори“ во Охрид, со кој одбележа две децении музичка кариера, а во текот на летото настапуваше и во други македонски градови.
Во меѓувреме се снима и документарниот филм „Слушни ме“, во режија на Радован Петровиќ и продукција на „ОХО“. Филмот ја обработува музичката кариера на Слаткаристика, но и неговото лично искуство со пелтечењето, предрасудите и стигмата, како и музиката како начин на изразување и надминување на бариерите.
Авторскиот тим првично доби 1,5 милиони денари поддршка од Агенцијата за филм, но по реакциите во јавноста Слаткаристика и екипата се откажаа од средствата и најавија дека филмот ќе продолжи да се реализира без нив.
