Во првиот квартал од годинава, 62 отсто од жителите на Словенија на возраст од 16 до 74 години користеле алатки со вештачка интелигенција, покажуваат податоците на словенечкиот Завод за статистика.
Во однос на минатата година, тоа е зголемување од 24 процентни поени, а употребата е трипати поголема во споредба со 2024 година. Најчесто се користеле алатки како ChatGPT, Copilot, Gemini, DeepL и Grok.
Најголем удел има меѓу младите, каде што AI алатки користат 90 отсто од испитаниците. Кај лицата од 65 до 74 години уделот е најмал. Жените ги користат овие алатки нешто почесто од мажите, односно 64 наспроти 59 отсто.
Вештачката интелигенција ја користат и 93 отсто од учениците и студентите, 71 отсто од вработените и 30 отсто од пензионерите. Девет од десет корисници ја применуваат главно за приватни цели, додека 37 отсто ја користат за работа.
Расте и примената во компаниите. Околу 38 отсто од словенечките компании користеле AI во првиот квартал, што е за 16 процентни поени повеќе од една година претходно. Најголема е употребата кај големите компании, каде што достигнува 83 отсто.
