Една од најголемите музички вечери во годината ќе се одржи вечерва во Лос Анџелес, каде што на сцената на MTV Video Music Awards 2026 ќе се појават некои од најголемите имиња на светската музика. Во центарот на вниманието ќе бидат Мадона и Тејлор Свифт, кои годинава носат неколку значајни моменти.
Мадона е меѓу најноминираните ѕвезди на церемонијата со 13 номинации, вклучително и во категориите за видео и изведувач на годината. Сепак, најголемото внимание го привлекува нејзиното враќање на сцената на MTV VMA по пауза од 23 години.
„Кралицата на попот“ ќе ја отвори церемонијата, со што повторно ќе застане на сцената на манифестацијата со која нејзината кариера е тесно поврзана.
Тејлор Свифт, пак, ќе испише нова страница во историјата на MTV VMA. Манифестацијата годинава за првпат ја воведува наградата Artist Director Honors, а Свифт е избрана за нејзина прва добитничка, како признание за нејзината работа зад камерата и влијанието врз музичките видеоспотови и визуелното раскажување.
Со новото признание, Свифт ќе стигне до 31 VMA награда. Таа годинава има и 11 номинации.
На церемонијата ќе биде прикажана и светската премиера на видеоспотот за нејзиниот нов сингл „Patient Zero“, кој Свифт сама го режирала. Во видеото се појавуваат Колин Фарел и Дакота Џонсон, додека зад камерата е оскаровецот Емануел Лубецки.
Домаќин на годинашните MTV VMA ќе биде Снуп Дог. Покрај Мадона, настапи се најавени и на LISA, RAYE, Shaboozey, Gunna, GENER8ION, Yung Lean и Sienna Spiro.
Меѓу артистите со најмногу номинации се и Сабрина Карпентер, Аријана Гранде и Бруно Марс.
Церемонијата ќе започне во 19:30 часот по американско источно време, односно во 1:30 часот по полноќ по македонско време, во ноќта меѓу недела и понеделник.
