Жена чиј сопруг починал по силни турбуленции за време на лет, поднела тужба против авиокомпанијата „Singapore Airlines“. Адвокатите на 74-годишната Линда Кичен од Торнбери, југозападна Англија, тврдат дека нејзиниот сопруг Џеф (73) се здобил со смртоносни повреди за време на летот од Лондон.
Линда во инцидентот ја скршила кичмата. Таа сега покренала постапка пред Високиот суд и бара отштета за да може да ја плати стручната помош што ѝ е потребна во текот на закрепнувањето.
„Кога ме одвоија од Џеф, знаев дека ситуацијата е лоша, но ништо не можеше да ме подготви за веста дека починал. Тоа целосно ме скрши“, изјавила Кичен.
Линда и нејзиниот сопруг патувале на шестнеделен одмор во Сингапур, Индонезија и Австралија кога во мај 2024 година се случил инцидентот.
Силни турбуленции го погодиле авионот над Мјанмар, по што тој принудно слетал во Бангкок.
„Имаше помали турбуленции над Европа, а се тресевме и над морето, но главната турбуленција се случи по околу десет часа од летот“, раскажала Кичен.
„Беше толку силно што имав чувство дека авионот паѓа. Помислив дека се уриваме“, се присетила таа.
Додека авионот нагло губел височина, Џеф паднал врз сопругата. Другите патници помогнале да го поместат, а лекар кој бил во авионот веднаш започнал со реанимација.
Се верува дека Џеф доживеал срцев удар поради наглото пропаѓање на авионот.
Линда Кичен била пренесена во болница додека нејзиниот сопруг сè уште бил во авионот. Дури два дена подоцна дознала дека тој починал.
„Поминав десет дена во болница пред со медицински лет да ме префрлат во Бристол. Патувањето ми е во магла поради силните болки. Во Велика Британија поминав уште една недела во болница, а по отпуштањето ми беше потребна голема помош дома“, раскажала таа.
Адвокатката Анте Корелиду, специјализирана за воздухопловно право и која ја застапува Линда Кичен, изјавила дека смртта на Џеф и тешките повреди на Линда покажуваат колку сериозен бил инцидентот.
„Иако поминаа повеќе од две години од смртта на Џеф, Линда и семејството сè уште имаат многу прашања за тоа што точно се случило. Тие сакаат да знаат дали можело да се направи повеќе за да се спречат повредите“, изјавила адвокатката.
