Англија обезбеди пласман во четвртфиналето на Светското првенство, откако во возбудлив натпревар на легендарниот стадион „Ацтека“ го совлада домаќинот Мексико со 3:2.
Херој на англиската репрезентација беше Џуд Белингем, кој со два гола во првото полувреме ѝ донесе значајна предност на својата селекција. Сепак, Мексико успеа да ја намали негативата пред паузата преку Хулијан Кињонес и да го врати натпреварот во неизвесност.
Во второто полувреме Англија остана со играч помалку, откако Џарел Кванса беше исклучен со директен црвен картон по интервенција на ВАР. И покрај тоа, англиската селекција доби пенал, кој сигурно го реализираше Хари Кејн за водство од 3:1.
Само десетина минути подоцна, и Мексико доби удар од белата точка по ВАР-проверка, а Раул Хименез намали на 3:2.
До самиот крај домаќините жестоко притискаа во обид да изборат продолженија, но англиската одбрана успеа да го сочува водството и покрај 11-минутното судиско продолжение.
Во четвртфиналето Англија ќе се соочи со Норвешка, која претходно го елиминираше Бразил. Натпреварот е закажан за 11 јули во Мајами.
Натпреварот беше одложен за еден час поради силно невреме што го зафати Мексико Сити пред почетокот на дуелот. Дополнителен предизвик за Англичаните беше и играњето на надморска височина од околу 2.200 метри, а во пресрет на натпреварот англиските медиуми пишуваа и за организациски проблеми.
Со оваа победа Англија го прекина извонредниот рекорд на Мексико на стадионот „Ацтека“, каде што домаќинот никогаш претходно немаше пораз на натпревар од Светско првенство.
