Во пресрет на објавувањето на мемоарите „The Steps“, Силвестер Сталоне отворено проговори за своето тешко детство, кое, како што открива, било исполнето со насилство, емоционална студеност и недостиг на родителска нежност.
Во интервју за „Њујорк тајмс“, 80-годишниот актер раскажал дека дел од најтешките спомени намерно не ги вклучил во книгата, бидејќи не сакал да предизвикува сожалување.
„Не ставив многу работи во книгата бидејќи не сакав да предизвикувам сожалување, но беше лудо“, признал Сталоне.
По разводот на неговите родители, тој извесен период живеел со татко му во Мериленд, кого го опишува како строг и физички насилен човек. Сталоне се присетил дека научил брзо да се наведнува кога татко му ќе посегнел по него.
Еден настан од детството особено му останал во сеќавање. Пред да заминат во црква, татко му го испратил да купи леб. Сталоне по пат сретнал пријатели и се вратил со погрешен вид леб. Според неговото сведоштво, татко му го удрил со нога во стомакот и продолжил да го удира, по што го оставил да лежи на улицата и заминал со автомобилот.
Децении подоцна, кога Сталоне бил во четириесеттите години, тој му се спротивставил на татко му и му рекол дека би сакал да бидат на иста возраст барем три минути, за да може да му возврати и да му покаже како е да бидеш претепан.
Според актерот, неговиот татко, кој тогаш имал 68 години, веднаш го предизвикал на борба. Сталоне смета дека токму жестокоста што ја доживеал во детството делумно го обликувала карактерот што подоцна го пренел во своите најпознати филмски ликови.
„Кога луѓето прашуваат: ‘Од каде ти е таа жестокост за да го глумиш Рамбо?’ Генетика“, рекол тој.
Покрај физичкото насилство, Сталоне вели дека во семејството речиси и немало нежност. Тој открил дека неговата мајка никогаш не го прегрнала, а татко му ретко покажувал блискост.
Сепак, се сеќава на еден мал, но значаен момент. Кога имал околу девет години, по работа околу коњите на татко му заспал во автомобилот. Татко му тогаш му ја ставил главата во скут и му ја ставил раката на главата.
„И тоа никогаш не го заборавив“, рекол Сталоне.
Актерот раскажал и дека како дете бил испратен во интернат, каде што родителите го посетувале само еднаш месечно.
„Ме одгледаа странци“, рекол тој, додавајќи дека со текот на времето интернатот станал негово природно опкружување.
Сталоне признава дека таквото детство го направило силен, но, како што самиот вели, „на погрешен начин“. Според него, вистинската љубов и блискост ги почувствувал дури подоцна во животот, преку сопругата Џенифер Флавин и своите деца.
Мемоарите „The Steps“ во продажба излегуваат на 29 септември, а Сталоне и понатаму одлучил дел од најтешките спомени да ги задржи само за себе.
