Она што уште од првите часови по пуштањето на билетите беше јасно, сега е и официјално, големото стенд-ап шоу на Стефан Николовски, закажано за 12 декември во Т арената „Борис Трајковски“ во Скопје, е целосно распродадено.
Во рекордно краток период, билетите за шоуто исчезнаа од продажба, а интересот на публиката ги надмина и најголемите очекувања. Уште на самиот старт беа продадени 1.000 билети за само три часа, додека во првите 24 часа бројката надмина 3.000. Продажбата продолжи со исто темпо, сè до официјалното SOLD OUT за 12 декември.
Но, приказната очигледно не завршува тука.
Веднаш по информацијата дека билетите се целосно распродадени, социјалните мрежи беа преплавени со пораки од публика која не успеала навреме да обезбеди свое место, а сè погласни се барањата за втор датум во Скопје.
И токму тоа можеби е најсилната потврда за она што Стефан Николовски успеа да го изгради, публика која не само што сака да го гледа, туку бара уште една вечер.
На 12 декември арената ќе биде поставена со специјална 360° сцена, концепт кој ќе ја стави публиката во самиот центар на шоуто и ќе донесе поинакво стенд-ап искуство од сè што досега сме гледале кај нас.
Дополнителна тежина на вечерта ѝ дава и специјалниот гостин Тони Михајловски, кој по две децении повторно се враќа на стенд-ап сцената.
Она што започна како најава за големо шоу, за многу кратко време прерасна во еден од најбараните настани на крајот од годината.
12 декември е распродаден. Т арена „Борис Трајковски“ е полна.
А судејќи според реакциите на публиката, сега останува само едно прашање:
Ќе има ли втор датум?
