Стотици приватни разговори на корисници со вештачко-интелигентниот четбот Claude, развиен од компанијата Anthropic, станаа јавно достапни преку интернет-пребарувачите, објави Би-Би-Си.
Според извештајот, Google и други пребарувачи индексирале разговори за кои корисниците ја активирале опцијата за споделување. Иако Claude предупредува дека содржината може да ја види секој што ја има врската, не било јасно наведено дека таа може да се појави и во резултатите од интернет-пребарувањата.
Anthropic, во меѓувреме, ја оневозможи индексацијата на овие разговори, но дел од нив веќе биле архивирани и продолжуваат да циркулираат на интернет.
Во јавно достапните разговори биле откриени лични и деловни информации, вклучувајќи биографии со имиња и контакт-податоци, приватни преписки, корпоративни документи и нацрт-проекти, меѓу кои и материјали поврзани со здравствениот сектор.
Од Anthropic истакнаа дека корисниците сами одлучуваат дали ќе ги споделат своите разговори и дека секоја содржина што ќе стане јавна може да биде архивирана од трети страни. Од Google, пак, посочија дека сопствениците на веб-страниците имаат алатки со кои сами одлучуваат дали нивната содржина ќе биде индексирана.
Ова не е прв ваков случај во индустријата. Минатата година OpenAI се соочи со сличен проблем, кога дел од разговорите со ChatGPT станаа достапни преку пребарувачите, а сличен безбедносен пропуст беше забележан и кај четботот Grok.
