Судија во американската сојузна држава Ново Мексико ги отфрли обвиненијата за сексуален напад против актерот Тимоти Басфилд, познат по улогата во серијата „Западно крило“. Во судските документи, до кои увид имал Ројтерс, како образложение за одлуката се наведува дека обвинителот не постапил правично и непристрасно.
Басфилд (69) во февруари беше обвинет пред голема порота за сексуални кривични дела против дете. Според обвиненијата, тој несоодветно допирал две момчиња близнаци, кои биле млади членови на актерската екипа на телевизиската драма „Чистачката“, што ја режирал и продуцирал за студиото „Фокс“ во Албукерки, Ново Мексико.
Актерот одлучно ја негираше вината, нарекувајќи ги обвиненијата против него „лаги“.
Сепак, ова не е единствениот случај во кој Басфилд се соочува со наводи за сексуално вознемирување. Во барањето за одредување притвор, поднесено на 14 јануари, се наведува дека Колин Свифт, татко на наводната жртва, пријавил во полицијата дека актерот пред неколку години сексуално ја злоупотребил неговата ќерка во Сакраменто, Калифорнија.
Според документот, девојката имала 16 години кога, за време на аудиција во театарот „Би стрит“, наводно изјавила дека Басфилд ја бакнал, ги ставил рацете во нејзините панталони и ги допирал нејзините интимни делови.
Во барањето се наведува и дека актерот наводно го молел семејството да не го пријави случајот во полиција доколку се согласи на терапија. Свифт, кој и самиот е терапевт, во тој период сметал дека тоа е најдоброто решение.
По појавувањето на овие наводи се огласи и театарот „Би стрит“, кој Басфилд го основал во 1986 година. Во соопштението за списанието „Пипл“ од установата наведоа дека се запознаени со извештајот за наводен инцидент што се случил во театарот пред околу 25 години.
Оттаму соопштија дека во тоа време ангажирале правен советник за спроведување внатрешна истрага, како и дека Басфилд нема никаква улога во организацијата од 2001 година.
Театарот појасни дека актерот не учествува во неговото тековно работење, ниту во активностите на персоналот, раководството и програмите. Иако сè уште е наведен како почесен член на управниот одбор, тој не учествувал во управувањето со установата ниту присуствувал на состаноците на одборот.
Од театарот додадоа дека, бидејќи случајот сега е дел од тековна истрага поврзана со одделен наводен инцидент во Ново Мексико, засега не можат да дадат дополнителни коментари. Воедно, порачаа дека нивната мисија останува да обезбедат безбедна, креативна и инклузивна средина за уметниците, учениците, семејствата и публиката, изразувајќи поддршка за сите што биле погодени од злоупотреба или искористување.
Според пријавата, Басфилд минатата есен, за време на испрашување во рамките на истрагата, ги негирал обвинувањата. Неговиот адвокат во вторникот не одговорил веднаш на барањето за коментар.
„Ќе се соочам со тие лаги. Тие се ужасни. Сè е лага“, изјавил актерот.
