Американски федерален суд ја поништи одлуката на Пентагон со која „Антропик“ беше прогласена за ризик за националната безбедност, оценувајќи дека за таквиот потег немало доволно оправдани причини.
Судијката Рита Лин пресуди дека одлуката била незаконска и дека имала цел да ја казни компанијата поради нејзините несогласувања со американската влада околу начинот на кој треба да се користи вештачката интелигенција.
Спорот меѓу Пентагон и „Антропик“ е поврзан со употребата на нејзините модели на вештачка интелигенција во воени цели. Компанијата одби да дозволи технологијата да се користи за масовен надзор на американски граѓани и за автономни системи за оружје, барајќи ограничувања за таквата примена. Пентагон, пак, инсистираше технологијата да може да се користи за сите законски цели.
Одлуката на судот претставува значајна победа за „Антропик“, која претходно оваа година доби и привремена судска заштита со која беше блокирана одлуката на Пентагон.
Означувањето на компанијата како безбедносен ризик можеше да има последици и надвор од соработката со американската војска. Претседателот Доналд Трамп им нареди на федералните агенции да престанат да ја користат технологијата на „Антропик“, додека министерот за одбрана Пит Хегсет порача дека компаниите што сакаат да соработуваат со американската војска ќе мора да прекинат соработката со „Антропик“.
Сепак, судот нагласи дека Пентагон не е должен да ја користи технологијата на компанијата и може да се определи за производи на други компании за вештачка интелигенција, доколку тоа го направи во согласност со законот.
Пентагон веќе ја намали употребата на технологијата на „Антропик“, а планира целосно да ја прекине до крајот на септември. Американската влада засега не потврдила дали ќе поднесе жалба на судската одлука.
Означувањето на „Антропик“ како безбедносен ризик беше невообичаено и поради тоа што станува збор за американска компанија, додека ваквите мерки досега најчесто биле применувани кон странски компании.
Извршниот директор на „Антропик“, Дарио Амодеј, претходно предупреди дека вештачката интелигенција може автоматски да собира и поврзува јавно достапни податоци за луѓето и да создава детална слика за нивниот живот. Тој оцени и дека технологијата сè уште не е доволно сигурна за целосно автономни системи на оружје.
