Европа има едно ново омилено место, а тоа е токму Охридското Езеро. Познатиот магазин „Time Out“ го стави на првото место меѓу најубавите места на континентот, издвојувајќи го како помирна, поопуштена и многу попристапна алтернатива на гламурозното Езеро Комо во Италија.
Комо со години е омилена дестинација на светските ѕвезди, луксузните вили и богатите туристи, но токму тоа носи и огромни гужви и високи цени. Охрид, пак, нуди сосема поинакво доживување – спектакуларна природа, чисто езеро, планини, историја и атмосфера што сè уште не е изгубена под налетот на масовниот туризам.
Охридското Езеро, кое се протега меѓу Северна Македонија и Албанија, е едно од најстарите и најдлабоките езера во Европа. Неговата кристално чиста вода и планините што се издигнуваат над брегот создаваат пејзаж кој, според патописците на „Time Out“, без проблем може да му парира на познатото Комо.
А кога ќе се додаде Охрид – приказната станува уште поубава.
Старото градско јадро со тесните калдрмисани улички, средновековните цркви и препознатливите теракотни покриви што се спуштаат кон езерото му даваат на градот посебен шарм. Посетителите можат преку ден да се капат и да ги истражуваат историските знаменитости, а навечер да уживаат во едни од најубавите зајдисонца над езерото.
Особено впечатлива е и легендата дека некогаш во Охрид имало 365 цркви – по една за секој ден во годината.
Она што дополнително го издвојува Охрид е цената. Додека престојот на Комо за многумина е луксуз, „Time Out“ посочува дека слично спектакуларно искуство во Охрид може да се доживее по многу попристапни цени.
И не е само македонската страна што го привлекла вниманието на патописците. На албанскиот брег се наоѓаат мирни села и природни предели, меѓу кои и Лин, познат по старите мозаични остатоци и живописната атмосфера покрај езерото.
На листата на „Time Out“ се најдоа и други познати европски места, како италијанскиот Алберобело, лондонската ботаничка градина Кју Гарденс и прочуената „Каса Батљо“ на Антони Гауди во Барселона.
Но, Охридското Езеро е на самиот врв.
И додека Комо продолжува да ги привлекува светските ѕвезди, Охрид добива сè поголемо внимание како место каде што природната убавина, историјата и мирот се спојуваат во една приказна.
Можеби токму затоа „Time Out“ го откри она што туристите сè почесто го препознаваат – дека за совршен европски одмор не мора секогаш да се оди таму каде што одат сите.
