Светски познатиот баскет-креатор и уличен кошаркар Мет Кјатипис, познат како МК, престојува во Македонија, а денеска оствари средба со министерот за надворешни работи и надворешна трговија Тимчо Муцунски.
Кјатипис објави фотографија од средбата со Муцунски, направена во просториите на Министерството, со македонското и знамето на НАТО во заднина.
„Чест ми е што се сретнав со министерот за надворешни работи. Ви благодарам за поддршката“, напиша Кјатипис во објавата, означувајќи го Муцунски.
Канадскиот кошаркар е една од најпрепознатливите личности во светот на уличната кошарка на социјалните мрежи. На Инстаграм има околу 3,4 милиони следбеници, а познат е по своите динамични натпревари „еден на еден“ и видеа кои собираат милионски прегледи. Кјатипис потекнува од Канада, а кошаркарската кариера го однела од средношколска и универзитетска кошарка во САД до професионален ангажман во Костарика. Подоцна се насочил кон создавање спортска содржина и улична кошарка, каде што изгради глобална публика. Тој последно кажа дека има македонско потекло, по својата мајка.
