Охрид утревечер ќе биде домаќин на големиот музичко-сценски спектакл „Силно светнал ден“, создаден по повод 35 години независност на Македонија. Настанот ќе се одржи на стадионот „Билјанини Извори“, каде програмата започнува во 19:30 часот со DJ сет, додека главниот спектакл е закажан за 20:30 часот. Влезот е слободен.
На сцената ќе настапат повеќе од 30 македонски музички имиња, меѓу кои Тамара Тодевска, Бојана Скендеровски, Бранко Николовски, Зуица Лазова, Александар Тарабунов, Полина Тасева, Пеце Суперхикс, Бојан Стојков, Миле Кузмановски, Огнен Здравковски, Дорис Димовска, Андријана Јаневска, Елена Ристевска, Ана Дурловска, Игор Дурловски, Ана Петановска, Драган Мијалковски, Димитар Андоновски, Дарко Гроздановски, Пере Нокаут, Ружица Брчиоска, Next Time, Таско, Тони Зен, Јанг Дади, Лина Пејовска, Марија Спасовска, Мина Блажев, како и други македонски изведувачи.
Зад режијата на спектаклот стои познатиот битолски режисер Дејан Пројковски, додека во центарот на приказната е Игор Џамбазов, кој како главен лик, домаќин и раскажувач ќе ја води публиката низ различните периоди од современата македонска историја.
„Силно светнал ден“ не е замислен како класична прослава на јубилејот, туку како сценско патување низ 35 години независност – преку музика, театар, поезија, танц и современ визуелен израз. Проектот ги обработува успесите, предизвиците, пресвртите и генерациите кои ја создаваа и ја создаваат Македонија.
Охрид е првата од вкупно 11 станици на турнејата низ земјава, а големата завршница е закажана за 4 септември во Скопје.
