Технички проблем во системот за обработка на податоци за летовите предизвика нарушувања во воздушниот сообраќај на повеќе британски аеродроми. Проблемот ги погоди и лондонските „Хитроу“, „Гетвик“ и „Стенстед“, како и аеродромите во Манчестер, Единбург, Бирмингем и други градови.
Британската служба за контрола на воздушниот сообраќај (NATS) соопшти дека проблемот е откриен и дека инженерски тимови работат на негово отстранување. Летовите продолжуваат, а воздушниот простор е отворен, но за целосно враќање на нормалниот режим ќе биде потребно време.
Според „Флајтрадар24“, проблемот предизвикал голем број доцнења, а дел од летовите биле откажани. На „Хитроу“ биле откажани околу 100 летови, а 367 биле одложени.
Британската министерка за транспорт, Хајди Александер, им се извини на патниците поради нарушувањата и порача дека се работи на решавање на проблемот.
На патниците им се советува, пред да тргнат кон аеродромите, да го проверат статусот на својот лет кај авиокомпанијата.
