Сингапурскиот премиер Ли Хсиен Лунг изјави денеска дека одлуката на американската пејачка Тејлор Свифт да ја направи оваа земја единствена станица во Југоисточна Азија на нејзината светска турнеја не е непријателски чин кон соседните земји.
„Нашите агенции преговараа со неа за аранжман да дојде во Сингапур и да настапи и Сингапур да биде единствената станица во Југоисточна Азија. Се покажа дека е многу успешен аранжман. Не го гледам тоа како непријателски однос“, рече Ли на прес-конференција во Мелбурн, каде што присуствува на регионален самит, пренесува Ројтерс.
Владата на Сингапур претходно објави дека постигнала договор со пејачот да настапи во градот-држава, без да ги спомене условите на договорот.
Најавата ги налути другите земји во регионот, а властите во Тајланд рекоа дека договорот е постигнат под услов тоа да биде единствениот настап на Свифт во Југоисточна Азија, додека филипинските власти рекоа дека тоа „не е она што го прават добрите соседи“. Концертите на Свифт во Сингапур се одржуваат од 2 до 9 март, а шест претстави се распродадени.
