ТикТок ќе плати 400 милиони долари за да го реши спорот со американските власти по обвиненијата дека незаконски собирал и задржувал лични податоци од деца и ја прекршил нивната приватност.
Спогодбата е постигната со американското Министерство за правда и Федералната трговска комисија (FTC), со што платформата избегнува продолжување на граѓанскиот правен процес во САД.
Според тужбата, ТикТок со години дозволувал деца помлади од 13 години да отвораат профили без согласност од родителите. Американските регулатори тврдат дека платформата собирала лични податоци од малолетници и ги задржувала дури и кога родителите барале тие да бидат избришани.
Со тоа, според властите, бил прекршен Законот за заштита на приватноста на децата на интернет (COPPA).
Покрај паричната казна, спогодбата предвидува ТикТок да ги избрише претходно собраните податоци од деца и да воведе независен механизам за проверка на возраста на корисниците. Компанијата ќе мора да примени и нови правила за детските профили, со ограничени можности за следење и споделување содржини.
Сепак, со ова не се затвораат сите правни проблеми на ТикТок во САД. Платформата и нејзината матична компанија „БајтДенс“ и натаму се соочуваат со посебен федерален закон поврзан со продажбата на американскиот дел од бизнисот или можноста за забрана на платформата во земјата.
