Денес е една од најпознатите холивудски ѕвезди, но патот на Том Круз до филмската слава започнал со многу поинаква работа. Пред да се прослави како актер, тој работел како помошник на домар во зграда на њујоршкиот Горен Вест Сајд.
Круз во разговор за емисијата „Добро утро, Америка“ откри дека работата подразбирала многу повеќе од едноставно одржување на зградата. Бил задолжен за поправки, чистење и различни секојдневни задачи, а често морал самиот да наоѓа решенија за проблемите.
„Морав да одам кај станарите и да им поправам работи. Бев мајстор за сè“, раскажа актерот.
Тој објасни дека уште додека растел, работел различни работи и дека не се плашел од физичка работа и практични задачи.
„Додека растев, работев многу различни работи. Го поправав греењето, секој ден го чистев мразот од влезот и се грижев ѓубрето редовно да се изнесува. Се грижев за сè што беше потребно“, рече Круз.
Според актерот, навиката да се посветува на секоја задача му останала и во неговата актерска кариера.
„Не можам да си помогнам. Едноставно велам: ‘Сакам да го поправам тоа. Јас ќе го решам!’“, објасни Круз.
Тој наскоро ќе се појави во филмот „Копач“ (Digger), во режија на Алехандро Гонзалес Ињариту. Во филмот го толкува ексцентричен нафтен тајкун кој е одговорен за еколошка катастрофа.
За потребите на улогата Круз значително го променил изгледот со помош на протетика, а работел и на усовршување на јужниот акцент. Сепак, актерот нагласил дека ликот не е заснован на вистинска личност.
Круз објаснил дека физичкиот изглед и шминката се важен дел од процесот на создавање лик, бидејќи му помагаат подобро да ја долови неговата личност.
Филмот „Копач“ во светските кина треба да пристигне на 2 октомври.
