Во близина на Албани, на западниот дел од Австралија, се случи трагедија кога маж бил усмртен по напад од ајкула долга речиси пет метри.
Според локалната полиција, 35-годишниот маж починал по двочасовни обиди на итната медицинска помош да му го спасат животот.
Инцидентот се случил во саботата утрото додека мажот со своето семејство ловел риба со подводна пушка во близина на островот Мајклмас, крај брегот на градот Албани, околу 375 километри југоисточно од Перт.
Полицијата соопшти дека итните служби биле повикани по пријава за можен напад од ајкула. Жртвата била пренесена со брод до брегот, каде што медицинските екипи се обиделе да ја реанимираат, но без успех.
Властите наведуваат дека се работи за ајкула за која се претпоставува дека била долга околу 4,5 до 5 метри и дека нападот се случил непосредно пред 11:30 часот по локално време во Западна Австралија.
Итната служба соопшти дека повеќе екипи останале на терен да укажат помош, додека надлежните власти апелираат граѓаните да бидат внимателни во областа и да ги почитуваат забраните за пристап до плажите.
Министерството соопшти дека соработува со полицијата и локалните власти за понатамошна истрага, а полицијата ќе подготви извештај за обдукција.
