Американскиот претседател Доналд Трамп ќе присуствува на финалето на Светското првенство меѓу Аргентина и Шпанија, кое ќе се одигра во недела од 21 часот, потврди портпаролката на Белата куќа, Каролин Левит.
Информацијата претходно ја најави претседателот на ФИФА, Џани Инфантино, а со потврдата од Белата куќа стана официјално дека Трамп ќе биде меѓу високите гости на завршниот натпревар на турнирот.
Неговото присуство доаѓа во период кога сè уште се водат дебати за одлуката на ФИФА да ја укине автоматската суспензија на американскиот репрезентативец Фоларин Балогун. Според медиумски информации, Трамп наводно контактирал со Инфантино и побарал да биде преиспитан црвениот картон на напаѓачот, по што ФИФА ја укинала казната и му дозволила настап во осминафиналето против Белгија.
ФИФА не ги потврди овие тврдења, а одлуката предизвика бројни реакции во фудбалската јавност бидејќи, според критичарите, ниту еден друг црвен или жолт картон на турнирот не бил поништен и покрај поднесените жалби од други репрезентации.
Балогун настапи на натпреварот против Белгија, но САД беа поразени со убедливи 4:1.
Трамп и претходно присуствуваше на големи спортски настани во САД, меѓу кои Супербоул, финалето на НБА, УС Опен во тенис и Рајдер купот. Минатата година тој го врачи трофејот на победникот на Светското клупско првенство, кое исто така се одржа во САД.
Овогодинешното Светско првенство заеднички го организираат САД, Канада и Мексико, а завршницата се игра во САД. Во натпреварот за третото место ќе се сретнат Англија и Франција, додека за светската титула ќе се борат Аргентина и Шпанија.
Победникот на Светското првенство, покрај традиционалниот трофеј и медалите, годинава за првпат ќе добие и шампионски прстени, по примерот на професионалните американски спортски лиги.
