Светскиот рекет број еден, Јаник Синер, е „унапредена верзија на Новак Ѓоковиќ“, смета италијанскиот тениски тренер Ренцо Фурлан, кој направи интересна споредба меѓу двајцата шампиони.
Фурлан, поранешен селектор на јуниорската репрезентација на Тенискиот сојуз на Србија, а денес тренер на италијанскиот тенисер Лука Нарди, изјави дека Синер во многу сегменти потсетува на Ѓоковиќ од неговите најдобри денови.
„Синер е унапредена верзија на Ѓоковиќ“, изјави Фурлан.
Според него, двајцата негуваат сличен стил на игра, се потпираат на долги размени, одлична контрола на ударите и трпеливо го принудуваат противникот да направи грешка.
„Играат сличен тенис, долго ја одржуваат топката во игра, а двајцата значително го подобрија и сервисот“, рече Фурлан за „Кориере дело спорт“.
Сепак, тој смета дека постојат и јасни разлики меѓу нив.
„Јаник игра побрзо од Новак и неговите удари се посилни“, истакна италијанскиот стручњак.
Фурлан го пофали и техничкиот квалитет на Синер, како и неговата работна етика.
„Неговиот технички репертоар е исклучително богат и му овозможува да игра фантастичен тенис. Покрај тоа, неговата работна етика е неверојатна. Никогаш не бега од предизвици, не се плаши да пробува нови работи и многу брзо учи“, нагласи тој.
Осврнувајќи се на моменталниот поредок во светскиот тенис, Фурлан оцени дека и покрај неодамнешните успеси на Александер Зверев, врвот и понатаму им припаѓа на Јаник Синер и Карлос Алкараз.
„Вимблдон покажа дека ништо не се променило. Синер и Алкараз и понатаму се чекор пред останатите. Тие знаат да го подигнат нивото на игра кога тоа е најпотребно“, заклучи Фурлан.
